Një sulm me thikë në një kopsht fëmijësh në provincën juglindore Guangdong të Kinës ka rezultuar në vdekjen e gjashtë personave, përfshirë tre fëmijë.
Policia ka raportuar se një i dyshuar 25-vjeçar me mbiemrin Wu është arrestuar në qytetin Lianjiang në lidhje me këtë ngjarje.
Po ashtu, viktimat përfshijnë një mësues dhe dy prindër, ka raportuar AFP, ndërsa edhe një person tjetër është plagosur gjithashtu.
Sulmi ka ndodhur të hënën në mëngjes, ndërsa autoritetet e kanë cilësuar si një “sulm me dashje”.
Zona rreth kopshtit është mbyllur dhe hetimet janë duke vazhduar.
Siç ka raportuar BBC, kjo ngjarje ka nxitur një reagim të gjerë në media sociale kineze, me shumë njerëz që janë të tronditur.
Edhe pse krimi i dhunshëm është relativisht i rrallë në Kinë, vendi është përballur disa herë me sulme me thika në vitet e fundit, përfshirë edhe në shkolla.
Në gusht të vitit të kaluar, një sulmues me thikë sulmoi një kopsht fëmijësh në provincën juglindore Jiangxi, duke vrarë tre persona dhe duke plagosur gjashtë të tjerë.
Në prill 2021, dy fëmijë vdiqën, ndërsa 16 të tjerë u plagosën gjatë një sulmi masiv me thikë në qytetin Beiliu, në rajonin autonom Guangxi Zhuang .
Në tetor 2018, 14 fëmijë u plagosën në një sulm me thikë në një kopsht fëmijësh në Chongqing , në jug-perëndim të Kinës.
Autoritetet kanë ndërmarrë masa për ta rritur sigurinë rreth institucioneve arsimore që nga viti 2010, duke përfshirë stërvitjen e evakuimit emergjent në shkolla pas një sulmi të mëparshëm në prill 2021.
Atë vit, Ministria e Sigurisë Publike u kishte kërkuar autoriteteve vendore që të “goditnin me vendosmëri” aktivitetet kriminale për të garantuar sigurinë e mësuesve dhe studentëve.
Pas sulmit të prillit 2021, Ministria e Arsimit urdhëroi gjithashtu stërvitjet e evakuimit emergjent në shkolla.