Qeveria gjermane ka dhuruar një donacion të ri për Forcat e Sigurisë së Kosovës, në vlerë prej 405 mijë eurosh.
Me anë të një komunikate, Ministria e Mbrojtjes ka njoftuar se ministri i këtij dikasteri Armend Mehaj është takuar me atasheun jorezident gjerman të mbrojtjes në Kosovë, nënkolonel Franz-Josef Nolte.
“Me këtë rast, u nënshkrua Marrëveshje për Donacion me Republikën Federale te Gjermanisë për dhurimin e kamionëve për autoshkollën e FSK-së, vlera e të cilit është 405 mijë euro”, thuhet në njoftim.
Në këtë takim është theksuar nevoja për avancimin e mëtejmë të bashkëpunimit bilateral edhe në të ardhmen në mes Ministrive dhe forcave të të dy vendeve.
Ministri Mehaj ka shprehur mirënjohjen për mbështetjen e shtetit gjerman për të gjitha të arriturat e deritashme të Ministrisë së Mbrojtjes dhe FSK-së.