Ministri i Mbrojtjes, Ejup Maqedonci, ka bërë të ditur se kanë pranuar një donacion në vlerë prej 3 milionë eurosh nga Gjermania, në kuadër të programit “Enable and Enhance”, me qëllim forcimin e kapaciteteve të Forca e Sigurisë së Kosovës.
Maqedonci u shpreh se ky donacion do të shërbejë për realizimin e pesë projekteve konkrete, njofton Dukagjini.
Sipas tij, fokusi kryesor do të jetë në plotësimin e flotës së transportit ushtarak si dhe në zhvillimin e kapaciteteve të mbështetjes mjekësore.
Tutje, Maqedonci thotë se me Ambasadorin e Gjermanisë në Kosovë, Rainer Rudolph, i cili sot zyrtarizoi këtë donacion, kanë diskutuar për zgjerimin dhe thellimin e mëtejmë të bashkëpunimit në fushën e mbrojtjes.
“Republika Federale e Gjermanisë përmes programit “Enable and Enhance” po vazhdon të mbështesë zhvillimin dhe rritjen e kapaciteteve të Forcës së Sigurisë së Kosovës. Sot, Ministria e Mbrojtjes ka pranuar një donacion në vlerë prej 3 milionë eurosh nga Ministria e Mbrojtjes e Gjermanisë, i dedikuar për realizimin e pesë projekteve konkrete, me fokus në plotësimin e flotës së transportit ushtarak si dhe në zhvillimin e kapaciteteve të mbështetjes mjekësore. Me Ambasadorin e Gjermanisë në Kosovë, Rainer Rudolph, i cili sot zyrtarizoi këtë donacion, diskutuam gjithashtu për zgjerimin dhe thellimin e mëtejmë të bashkëpunimit në fushën e mbrojtjes” ka shkruar Maqedonci.