Gjykimi ndaj ish-krerëve të UÇK-së në Hagë ka marrë vëmendje edhe te mediat ndërkombëtare. Kësaj here, gazeta “The Guardian” ua ka kushtuar një tekst ish-presidentit të Kosovës, Hashim Thaci dhe të tjerëve që po gjykohen nga Gjykata Speciale.
Në artikull thuhet se ky gjykim do ta rishkruajë historinë e luftës.
“Gjyqi, i cili u hap dy vjet pasi burrat u dorëzuan në juridiksionin e gjykatës dhe pritet të zgjasë deri në gjashtë vjet, tashmë duket i sigurt se do të rishkruajë historinë e konfliktit”, thuhet në artikullin e The Guardian.
Ish-presidenti Thaçi, përshkruhet nga “The Guardian” si një nga politikanët më të shquar e me më ndikim në Kosovë, teksa përmendet edhe mbështetja ndërkombëtare që ai e kishte, nga figurat si Tony Blair, Madeleine Albright e Hillary Clinton.
Aty po ashtu thuhet se Thaçi dallohej nga bashkëluftëtarët e tij për inteligjencën dhe vetëbesimin, duke përmendur edhe përfaqësimin që ai ia bëri Kosovës, në “Konferencën e Rambujesë”.
“Më pas, në fund të 20-tave, ai u dallua mes kolegëve të tij komandantë për inteligjencën dhe besimin e tij, duke përfaqësuar më vonë UÇK-në në negociatat e dështuara të paqes në Rambuje, Francë, në fillim të vitit 1999, që i paraprin ndërhyrjes së NATO-s në konflikt”, thuhet në artikull.
Në artikullin e “The Guradian”, përmendet edhe Raporti i Dick Martyt, si arsye e themelimit të Gjykatës Speciale. Po ashtu, ndër të tjera, aty sqarohet se me këto pretendime më nuk merret Gjykata Speciale, edhe pse fillimisht ishte krijuar duke pasur për bazë atë.