Gjiganti teknologjik Google është paditur në Gjykatën e Lartë të Kalifornisë për mospërfshirjen e gjuhës shqipe në gjuhët e mbështetura nga Google.
Padia është bërë nga shtetasi amerikan, Haki Dervishi dhe Neshad Asllani, mjek kosovar, anëtar i bordit në organizatën “Dekada për të Drejtat e Njeriut” në New York.
Ky diskriminim, sipas tyre, ka pasur pasoja të mëdha në media, marketing, investime të huaja, zhvillim ekonomik dhe teknologjik në Shqipëri, Kosovë dhe kudo që flitet gjuha shqipe.
“Paditësit besojnë se diskriminimi i vazhdueshëm i gjuhës shqipe nga Google ka bërë që folësit e gjuhës shqipe të diskriminohen nga pjesa tjetër e Evropës dhe botës në zhvillimin e biznesit, në marketing dhe gazetari, pasi janë të përjashtuar nga platformat Google Ads, Google Adsense dhe Google Admob”, thuhet në njoftimin për media të dërguar nga Dervishi dhe Asllani.
Vlen të ceket dokumentimi i shkeljes së të drejtave të njeriut dhe lobimi i vazhdueshëm në Kongresin Amerikan për lirinë dhe pavarësinë e vendit tonë.
Por, sipas Asllanit dhe Dervishit, angazhimi i tyre “lobues dhe koordinimi i aktiviteteve për pranimin e Kosovës në Rotary International më 5 Nëntor të vitit 2005, që rezultoi me njohjen e parë ndërkombëtare të Kosovës, do të mbetet një nga momentet më të ndritura të përkushtimit të tyre për kauzën kombëtare”.
Sipas Dervishit dhe Asllanit, kjo risi e mëtejshme e teknologjisë informative krijon mundësi reale për zhvillim ekonomik, punësim, investime të huaja, marketing dhe informim cilësor, duke iu mundësuar gazetarëve të bëjnë punën e tyre edhe më mirë.