Ish-deputeti i Lidhjes Demokratike të Kosovës, Blerim Grainca, ka theksuar rolin e pazëvendësueshëm të Ibrahim Rugovës në historinë e shtetit të Kosovës.
I ftuar në Debat Plus, Grainca tha se “kur flasim për Rugovën, së pari duhet të konstatojmë se jemi shumë të vegjël për t’u marrë me personalitetin dhe figurën e tij historike”.
“Për shumicën e popullit shqiptar, ai vazhdon të mbetet ati i Pavarësisë së Kosovës, e deshti dikush apo s’e deshti,” u shpreh Grainca.
Ai vlerësoi veçanërisht kontributin e Rugovës në fushën e arsimit, duke theksuar se sukseset e asaj periudhe nuk mund të maten me viktima, por me numrin e nxënësve dhe studentëve që arritën të diplomonin në kushte jashtëzakonisht të vështira.
“Suksesi i arsimit nuk matet me viktima, por me numrin e nxënësve që kanë arritur të diplomojnë në ato kushte të rënda. Ideja ishte të ndërtohej një sistem që prodhon aq sa mundet”, tha ai.
Sipas Graincës, sa herë që flitet për sukseset e Kosovës, emri i Ibrahim Rugovës është i pashmangshëm, pavarësisht bindjeve personale apo politike.
“Sa herë flitet për suksesin e Kosovës, emri i Ibrahim Rugovës është i pashmangshëm. E pëlqeu apo s’e pëlqeu dikush. Sa herë flitet për institucionet, flitet për Rugovën si themeltar i atyre institucioneve”, theksoi ai.