Zyra e Kombeve të Bashkuara për Koordinimin e Çështjeve Humanitare (OCHA), ka paralajmëruar se situata humanitare në Iran po përkeqësohet, ndërsa luftimet po përhapen në gjithë vendin.
Sipas raportit të fundit, mes 17 marsit dhe 3 prillit është shënuar rritje e ndjeshme e viktimave civile, si pasojë e sulmeve në aeroporte, spitale, zona banimi, tregje, shkolla, objekte industriale dhe vende të trashëgimisë kulturore.
OCHA bën të ditur se nga fillimi i luftës deri më 30 mars në Iran janë regjistruar: Mbi 2,100 civilë të vrarë – Mbi 27,900 të plagosur – Mbi 3.8 milionë persona të prekur nga konflikti.
Po ashtu, deri më 1 prill, mbi 115,000 njësi banimi civile janë dëmtuar.
Agjencia e OKB-së paralajmëron gjithashtu se sulmet ndaj infrastrukturës kritike dhe objekteve industriale kanë shkaktuar ndërprerje të shërbimeve bazë, përfshirë energjinë elektrike, ujin dhe telekomunikacionin, duke rritur rreziqet afatshkurtra dhe afatgjata për mjedisin dhe shëndetin.