Faqja online e Parlamentit të Shqipërisë është hakuar të hënën, duke e bërë të pamundur hapjen e saj në internet.
Përgjegjësinë për këtë sulm kibernetik e ka marrë grupi i hakerëve “Homeland Justice”.
Këta të fundit kanë pranuar sulmin dhe kanë dhënë edhe një mesazh në grupin e tyre në rrjetin social “Telegram”.
“Do të paguajnë edhe ata qe kanë zënë karriget e Kuvendit. Deputetet e korruptuar së shpejti do të shkatërrohen. Demonët që janë brenda tyre do të demonstrohen ndaj çdo njërit që kërkon të dijë të vërtetën”, thuhet në mesazhin e publikuar.
Përveç faqes së Parlamentit, hakerët e “HomeLand Justice” kanë sulmuar edhe faqe të tjera online të disa kompanive të mëdha që operojnë në Shqipëri, megjithatë këta të fundit kanë mundur të rikthejnë aksesin online.
Kjo nuk është hera e parë që hakerët e “HomeLand Justice” sulmojnë faqet online të institucioneve shqiptare, ku më herët janë publikuar të dhëna sensitive të qytetarëve, por edhe zyrtarëve shqiptarë, ku pati sulme edhe ndaj sistemit “TIMS” të policisë.
Organet e akuzës në Shqipëri kanë nisur edhe një hetim për sa i përket këtyre sulmeve, ku një kërkesë për mbylljen e grupit të “Home Land Justice” në Telegram iu bë edhe Rusisë, për shkak se serverat rezultojnë në këtë shtet, shkruan ABCNews.
Më 7 shtator të vitit 2022, Shqipëria akuzoi Iranin si autor të sulmit masiv kibernetik që goditi sistemet e teknologjisë së informacionit të qeverisë, duke i paralizuar për disa ditë të gjithë shërbimet online.
Kryeministri Edi Rama njoftoi ndërprerjen “me efekt të menjëhershëm”, të marrëdhënieve diplomatike me këtë shtet, për shkak të këtij sulmi. Po atë ditë, Shtetet e Bashkuara dënuan sulmin kibernetik ndaj aleatit të NATO-s dhe thanë se kishin arritur në përfundimin se pas tij qëndronte Irani.