Deputeti nga radhët e Lëvizjes Vetëvendosje, Haki Abazi, ka kërkuar dorëheqjen e ushtruesit të detyrës të drejtorit të Policisë së Kosovës, Fehmi Hoti.
Në “Debat Plus” të RTV Dukagjini, Haki Abazi, ka thënë se nëse rasti i vrasjes së 35-vjeçares kishte qenë i lajmëruar në polici, drejtori i saj duhet të japë dorëheqje.
“Unë mendoj që drejtori i Policisë sonte duhet të japë dorëheqje. Si deputet po e them me plot përgjegjësi, nëse rasti ka qenë i lajmëruar në polici”, ka deklaruar Abazi.
Gruaja shtatzënë, 35-vjeçare, e cila ka humbur jetën, është qëlluar me armë zjarri nga një person, i cili dyshohet se është burri i saj. Kështu ka bërë të ditur një anëtar i stafit të QKUK-së për Radio Dukagjini.
Motra e gruas shtatzënë, e cila u vra në oborrin e QKUK-së, këtë të mërkurë, ka bërë të ditur se për rastin e saj, Policia e Kosovës ka qenë në dijeni që katër muaj.
Në gjendje të rëndë emocionale e mes lotësh, Mirushe Lohaj, u shpreh se të martën për RTV Dukagjini se familjarët e burrit, i cili dyshohet se e ka vrarë gruan e tij, e kanë lutur të kthehet në shtëpi.
Ajo theksoi se nga mediat e ka mësuar për rastin tragjik ku mbeti e vrarë motra e saj.
Jetën e kanë humbur edhe gruaja edhe fëmija, dyshohet se vdekja e tyre ka qenë e menjëhershme.