Zëdhënësja e LDK-së, Sibel Halimi ka thënë se suspendimi i zyrtarëve policorë që nuk e kryen zbatimin e urdhrit të mbrojtjes për gruan e ekzekutuar mizorisht në oborrin e QKUK-së është lajm i mirë.
Por kjo sipas Halimit nuk mjafton pasi bashkë me këta policë duhet te largohet edhe eprori i tyre, ministri i Punëve të Brendshme, Xhelal Sveçla.
“Është padyshim lajm i mirë suspendimi i zyrtarëve policorë që nuk e kryen detyrën, zbatimin e urdhërit të mbrojtjes për gruan e ekzekutuar mizorisht në oborrin e QKUK-së. Mirëpo kjo nuk mjafton. Bashkë me ta, duhet të shkojë edhe eprori i tyre, Ministri i Brendshëm. Kjo duhet të ndodh së paku si akt moral, nëse jo për tjetër”, ka thënë Halimi.
Ajo tha se gruaja që u privua nga jeta bashkë me foshnjën e saj, ishte e shtrirë në një institucion publik shëndetësor, e sipas Halimit ishte nën përkujdesjen e shteti që dështoi ta mbronte atë.
“Gruaja që u privua nga jeta bashkë me foshnjën e saj, ishte e shtrirë në një institucion publik shëndetësor. Pra, ishte nën përkujdesjen e shtetit që dështoi ta mbronte atë. Ky dështim i pafalshëm dhe me pasoja fatale, nuk mund të kalojë me disa dorëheqje në fundin e zinxhirit komandues, pa ndodhur ato edhe në krye të tij”, ka shtuar ajo.