Koalicioni i Organizatave për Mbrojtjen e Fëmijëve në Kosovë – KOMF, i cili përfaqëson 35 organizata joqeveritare, gjatë ditës së enjte kanë adresuar një letër të hapur te Qeveria e Kosovës, duke kërkuar ndërmarrjen e masave të menjëhershme për parandalimin e mbylljes së shërbimeve sociale për fëmijët e cenueshëm.
Për këtë ka reaguar zëdhënësja e LDK-së, Sibel Halimi, duke kritikuar Qeverinë se “këta fëmijë i shfrytëzon për fushata e qëllime elektorale, ndërsa kur duhet të bëjë diçka konkrete dhe bazike për ta, i braktis pamëshirshëm”.
“Fëmijët pa përkujdesje prindërore, viktima të dhunës në familje, abuzimit dhe keqtrajtimit rrezikojnë të mbesin në mëshirë të fatit. Këtë fakt të trishtë e mësuam nga letra e hapur e dërguar sot nga Koalicioni i Organizatave për Mbrojtjen e Fëmijëve në Kosovë, në drejtim të Qeverisë. Është absurde që shërbimet sociale për pjesën më vulnerabël të shoqërisë të rrezikojnë mbylljen, në një kohë buxheti i shtetit trajtohet si thes dhuratash fundviti. Është po ky pushtet që këta fëmijë i shfrytëzon për fushata e qëllime elektorale, ndërsa kur duhet të bëjë diçka konkrete dhe bazike për ta, i braktis pamëshirshëm. Politika shtetërore në Kosovë dhe njerëzorja nuk janë thjesht të ndryshme; janë bërë në fakt krejt e kundërta e njëra-tjetrës!”, ka shkruar Halimi.