Zëdhënësja e LDK-së, Sibel Halimi, ka thënë se perspektiva e afirmimit ndërkombëtar që i duhej Kosovës, po i mbyllet çdo ditë një derë, derisa sipas saj, “kryeministri Kurti dhe garnitura e tij qeverisëse po na thonë se masat e BE-së janë të padrejta”.
“Por në këtë situatë, kur Kosova po vihet nën masa kufizimi, fare nuk ka rëndësi aspekti moral i çështjes, se kush ka të drejtë!? Si në opozitë ashtu edhe në qeveri, prosperimi i vendit nuk ka qenë dhe nuk është prioriteti i Kurtit, por vetëm pushteti ideologjik i tij – pa zgjedhë mjete – edhe përmes fake news, dhunës dhe popullizmit”, ka shkruar Halimi.
Halimi ka thënë tutje se nga moskoordinimi me aleatët, Kosova “ka shkuar” në përshkallëzim e sanksione e drejt izolimit.
“Kjo është fotografia aktuale e vendit tonë: I vetmi shtet evropian nën sanksione! Krejt dhe drejt …autoritarizmit!”, ka shkruar ajo.
Kryeministri i Kosovës, Albin Kurti, i ka komentuar masat e Bashkimit Evropan ndaj Kosovës, duke i cilësuar si “ të padrejta”.
Kurti më tej ka thënë se shteti i Kosovës nuk mund të bëjë kompromis me sundim e ligjit e as me kushtetutshmërinë.