“Problemet e qytetarëve nuk janë tema ‘interesante’ për përsiatjet e ligjërimet e kryeministrit”.
Kështu ka deklaruar zëdhënsja e Lidhjes Demokratike të Kosovës(LDK), Sibel Halimi, duke iu referuar paralajmërimeve për reduktime të rrymës nga ana e KEDS-it.
Halimi ka thënë se në mes të gushtit, familjeve në Kosovë përveç krizës së çmimeve të larta të produkteve esenciale për jetë tani i shtohet edhe “ngarendja për ta zënë rrymën e kryer obligimet e përditshmërisë që po i rëndohet çdo ditë e më shumë”.
Për Halimin, pushteti ka ngritur lart flamurin e bardhë të dorëzimit, pasi nuk po merret me krizën e energjisë elektrike e të çmimeve.
Ndërkaq, Kompania Kosovare për Distribuim me Energji Elektrike në Kosovë (KEDS), ka njoftuar se të hënën e 15 gushtit do të fillojë me kufizimet e energjisë elektrike.
Përmes një komunikate për media, KEDS-i ka njoftuar se këto kufizime, në bazë të planit të dërguar gjatë ditës së hënë, konsumatorët do të kenë nga gjashtë orë energji elektrike dhe dy orë kufizime.
Sipas njoftimit, energjia elektrike e blerë deri më tani ka shkaktuar humbje enorme.
“Gjatë shqyrtimit të jashtëzakonshëm tarifor, rregullatori kishte marrë parasysh subvencionin e qeverisë prej 100 milionë eurosh. Asnjë cent nga ajo shumë nuk është shpërndarë te furnizuesi. Kjo, e ka rënduar gjendjen edhe më tepër. Sot, disa muaj pas, të gjitha mundësitë financiare janë shteruar”, thuhet në njoftim.