Kandidati i PDK-së për kryeministër, Bedri Hamza, ka zhvilluar një vizitë në Shtetet e Bashkuara të Amerikës (ShBA).
Ai ka thënë se gjatë vizitës ka mbajtur një takim me asistentin special të presidentit Biden, ambasadorin Michael Carpenter, si dhe me drejtoreshën për Ballkan dhe Evropë Qendrore të KSK-së, Kathleen Larkin.
Hamza thotë se nga këto takime ka marrë një mesazh të qartë që “ShBA-të qëndrojnë pranë nesh dhe mbështesin pavarësinë, sovranitetin dhe integritetin territorial të Kosovës”.
“Vizitën time në SHBA e fillova me një takim me Asistentin Special të Presidentit Biden, Ambasadorin Michael Carpenter, që njëherësh është Drejtor i Lartë për Evropë në Këshillin për Siguri Kombëtare (KSK), si dhe me Drejtoreshën për Ballkan dhe Evropë Qendrore (KSK), znj. Kathleen Larkin. Mesazhi që mora ishte i qartë: SHBA qëndrojnë pranë nesh dhe mbështesin pavarësinë, sovranitetin dhe integritetin territorial të Kosovës”, ka shkruar Hamza në Facebook.
Tutje ka thënë se në takim kanë diskutuar edhe për qëllimet strategjike të Kosovës.
“Ne u pajtuam që tani është koha për progres në konsolidimin e Kosovës drejt njohjes nga pesë shtetet anëtare të BE-së, të cilat ende nuk e kanë njohur pavarësinë e Kosovës, drejt sigurimit të udhërrëfyesit për anëtarësim të Kosovës në Partneritet për Paqe dhe përfundimisht në NATO e BE. Këto janë qëllimet strategjike për të cilat folëm gjerësisht. Unë prezantova shkurtimisht vizionin dhe planin tim që Kosova të lëvizë më shpejt përpara drejt zhvillimit ekonomik, rritjes së pagave në sektorin publik, investimeve kapitale dhe rritjes së mirëqenies së qytetarëve”, ka vijuar Hamza.
Partneriteti me ShBA-në sipas Hamzës është i rëndësisë jetike dhe “për Kosovën e mua edhe i pazëvendësueshëm”.