Ministri i Mjedisit, Planifikimit Hapësinor dhe Infrastrukturës, Liburn Aliu, ka bërë të ditur se janë ndarë 38 milionë euro për përfundimin e rrugës nacionale Prishtinë-Besi-Podujevë.
Ai ka thënë se hapja e këtij tenderi vjen pasi ka përfunduar elaborati i shpronësimit dhe është bërë disponueshmëria e mjeteve nga Ministria e Financave.
“Tani pasi ka përfunduar elaborati i shpronësimit dhe që kemi marrë deklaratën për disponueshmërinë e mjeteve nga MFPT, sot është hapur afati për pranimin e tenderëve për ndërtimin e rrugës nacionale Prishtinë-Besi-Podujevë”, ka shkruar Aliu në Facebook.
Ministri Aliu shpreson që sa më shpejt të vijojë puna për ndërtimin e rrugës Prishtinë-Podujevë, e cila sipas tij, është një investim infrastrukturor me rëndësi madhore për të gjithë qytetarët e Kosovës, qarkullimin rrugor në përgjithësi, por dhe për zhvillimin ekonomik të vendit.