Të paalternativë e ka quajtur perspektivën evropiane të Kosovës, lideri i Aleancës për Ardhmërinë e Kosovës (AAK).
Aplikimin e Kosovës për Këshill të Evropës (KE), Haradinaj e ka mirëpritur duke thënë se ky është një lajm i mirë për vendin.
“Perspektiva evropiane e Kosovës është e pa alternativë. Si vend kemi ecur para drejt përmbushjes së kritereve të përcaktuara nga Bashkimi Evropian dhe kemi marrë notat më të larta në zbatimin e Marrëveshjes Stabilizim Asociimit tash e sa vjet. Aplikimi sot i Kosovës në Këshillin e Evropës, është lajm i mirë për vendin”, ka shkruar Haradinaj në Facebook.
Në vazhdim, Haradinaj ka theksuar nevojën e shtetit të Kosovës për liberalizimin e vizave dhe pastaj marrjen e statusit të kandidatit për në Bashkimin Evropian (BE).
“Është jetike për ne që Bashkimi Evropian t’ia hapë dyert Kosovës në proceset integruese, duke liberalizuar vizat fillimisht dhe duke i dhënë Kosovës statusin e kandidatit. Kosova natyrshëm është pjesë e familjes evropiane”, ka shkruar Haradinaj.
Ndryshe, të mërkuren, lideri i AAK-së është pritur në takim nga emisari amerikan Gabriel Escobar, Ndihmës Asistent i Sekretarit të Shtetit për Çështje të Evropës dhe Evroazisë.
Përmes një postimi në Facebook Haradinaj ka bërë të ditur se në takim e ka shprehur përkushtimin e tij për një marrëveshje gjithëpërfshirëse në mes të Kosovës dhe Serbisë.
Haradinaj ka reaguar pas njoftimit nga Ministria e Punëve të Jashtme dhe Diasporës (MPJD), se Kosova zyrtarisht ka aplikuar në Këshillin Evropian (KE).
Ministrja Donika Gërvalla, ka njoftuar se Kosova pritet të jetë anëtare e plotë e Këshillit Evropian.