I pari i AAK-së, Ramush Haradinaj, në prag të përvjetorit të 15-të të pavarësisë së Kosovës, ka thënë se përgjatë historisë së Kosovës shumë familje dhanë kontribut të çmuar në përpjekjet për liri e pavarësi.
Haradinaj tha se këto familje janë ato që mbajtën gjallë rezistencën ndaj okupatorit dhe janë ato që trasuan rrugën për të ardhur deri te liria që gëzon shteti i Kosovës.
“Njëra nga këto familje patriotike, është edhe ajo e heroit të kombit, Kadri Bistrica nga Mitrovica. Nga mosha 20-vjeçare, ai mori pjesë në kuvendet e burrave të Shalës së Bajgorës, ku bëheshin pajtimet e gjaqeve. Në shtator të vitit 1941, Kadriu u zgjodh udhëheqës i forcave vullnetare që mbronin kufirin verior të shqiptarëve. Gjatë betejës së famshme të Cerajës dhe Sllatinës”, ka shkrar Haradinaj.
Haradinaj theksoi se në prag të përvjetorit të 15-të të pavarësisë së Kosovës, “vizitova këtë familje që t’i uroj dhe t’i shpreh mirënjohjen për kontributin e dhënë për lirinë e vendit”.