Kryetari i Aleancës për Ardhmërinë e Kosovës (AAK), Ramush Haradinaj përmes një postimi në Facebook, ka ftuar prokurorinë të hetojë siç thotë ai fryerjen e faturave të energjisë elektrike.
Ai i ka thënë të parit të qeverisë se kriza energjetike nuk zgjidhet me punësim të militantëve.
“Kryeministër kriza energjetike në Kosovë nuk zgjidhet me punësimin enorm të militantëve partiakë e as të atyre që sipas teje janë për dasma e kanagjegje”, ka shkruar Haradinaj.
Sipas tij, faturat e energjisë pas shtrenjtimit në shumë raste e tejkalojnë dyfishin, dhe ka dyshime serioze se ato janë fryrë përtej çdo tarife, kategorie apo kriteri.
Ai ka ftuar organet e hetuesisë që krahas hetimeve për punësime abuzive në Korporatën Energjetike të Kosovës (KEK), të fillojnë hetimet edhe për faturat e fundit të energjisë, sepse ka dyshime serioze që qytetarët janë vjedhur.
Nuk është hera e parë që kryetari i AAK-së reagon me postime publike ndaj kryeministrit të Kosovës, Albin Kurti.
Po në janar të këtij viti, ai e kishte ironizuar me një postim në Facebook për rikthimin e bllokut B2 të termocentralit “Kosova B”.
“Nuk është hera e parë që bjen e rikthehet ky bllok. Kryeministri i paska bërë disa pyetje hipotetike. Eh sikur ta kishim të renovuar ‘Kosovën A’. Eh sikur ti kishim blloqet B-3, B-4.Po paska harruar të thotë: Eh sikur të mos e kisha bllokuar projektin ‘Kosova e Re’; Eh sikur të mos e kisha refuzuar gazin amerikan. Po e shkuara është e shkuar. Ai nuk është aty për të vajtuar por për të gjetur zgjidhje, kishte shkruar Haradinaj.
Ndër të tjera ai kishte reaguar me të njëjtën kritkë, “Kryeministër mos e shtrenjto rrymën, e lëri retorikat”.
Ndërsa, Kurti kishte thënë se me kthimin e bllokut B2 të termocentralit “Kosova B” në funksion, tashmë për çdo orë po paguhen 50 mijë euro import më pak.
Kosova është duke u përballur me një krizë energjetike që nga muaji dhjetor për çka tani Zyra e Rregullatorit të Energjisë ka paralajmëruar edhe shtrenjtim të çmimit të energjisë, e cila është pranuar edhe nga Qeveria e Kosovës.