Kryetari i Aleancës për Ardhmërinë e Kosovës, Ramush Haradinaj, ka kërkuar hetim ndërkombëtar për situatën në veri të Kosovës.
Në një shkrim në Facebook, duke komentuar sulmet ndaj Policisë së Kosovës nga një grup i organizuar dhe uniformuar serb, Haradinaj ka thënë se situata kërkon hetim ndërkombëtar.
Haradinaj poashtu ka deklaruar se Serbia tashmë ka konfirmuar se është e përfshirë në sulmet e armatosura në veri.
“Prandaj në një situatë të tillë është i domosdoshëm një hetim ndërkombëtar për të zbardhur skenaret e destabilizimit të situatës jo vetëm në Kosovë, por në gjithë rajonin e Ballkanit”, ka shkruar Haradinaj.
Ndryshe, të dielën e 24 shtatorit, si pasojë e një sulmi të armatosur në Banjskë të Zveçanit u vra polici Afrim Bunjaku dhe disa mbetën të lënduar.
Në aksionin e Policisë, dhjetëra sulmues të armatosur e uniformuar serbë u rrethuan në fshatin Banjskë.
Nga aksioni policor deri tash janë konfirmuar tre sulmues të vrarë e gjashtë të arrestuar.
Ndërsa janë kapur edhe arsenal armësh, ndërsa disa sulmues të tjerë tashmë është thënë se kanë ikur dhe po trajtohen në spitalet e Serbisë.
Në përkrahje të sulmuesve të vrarë, Serbia ka shpallur ditë zie. Dhe se Serbia nuk ka dënuar sulmin ndaj Policisë së Kosovës.