Ish-deputeti i Aleancës për Ardhmërinë e Kosovës (AAK), Daut Haradinaj, ka kërkuar nga kryeministri i Kosovës, Albin Kurti, reflektim sa i përket Ligjit të Pagave.
Një reagim të tillë Haradinaj e bëri duke kërkuar kushte më të mira për policët që janë në krye të detyrës në Kosovë.
Sipas Haradinajt, Ligji i pagave nuk i përmbush nevojat e policëve.
“Çdo herë, Policia e Kosovës është në krye të detyrës. Ne, me të drejtë krenohemi me punën e tyre. Por, trajtimi i tyre në Ligjin e Pagave as për së afërmi nuk i përmbush nevojat e tyre”, ka shkruar Haradinaj në llogarinë e tij në Facebook.
Ndërsa, është shprehur se ka pasur pritje që pagat e policëve do të rriten por që rrezikohet të ketë edhe ulje të tyre.
“Shumë prej tyre më kanë shkruar, të zhgënjyer me nivelin e trajtimit që ju jep ky ligj. Edhe pse pritej që t’iu rritet paga, me ligjin e ri për shumë pjesëtarë madje parashihet edhe ulja e tyre”, ka vijuar ai.
Ndërsa, reagimin e tij e ka përmbyllur me një thirrje drejtuar kryeministrit të Kosovës, Albin Kurti, duke i thënë “Kryeministër, reflekto”.