Kryetari i Aleancës për Ardhmërinë e Kosovës (AAK), Ramush Haradinaj, në lidhje me çështjen e targave ka thënë se kërkesa amerikane për shtyrje të afatit kohor do të duhej të pranohej me kohë, pasi tashmë mund të mos ketë një zgjidhje të përkryer.
“Zgjidhja më e mirë do të ishte pranimi i kërkesës amerikane në kohë. Në situatën e krijuar tani, duhet të gjendet një zgjidhje, e cila mund të mos jetë e përkryer”, ka shkruar Haradinaj në Facebook.
Ndër të tjera, ai ka thënë se situata në veri të vendit është keq dhe drejt eskalimit.
Ndërkaq, Departamenti Amerikan i Shtetit, shtetet e QUINT-it dhe Bashkimi Evropian kanë ritheksuar kërkesën ndaj qeverisë së Kosovës për shtyrjen e afatit ekzistues të targave për 10 muaj.
Më 21 nëntor, takimi në mes të kryeministrit të Kosovës, Albin Kurti dhe presidentit të Serbisë, Aleksandër Vuçiq me ndërmjetësimin e BE-së në Bruksel përfundoi pa marrëveshje.
Megjithatë, pas mesnatës të së hënës, me kërkesë të ShBA-së, Kurti ka vendosur që ta shtyjë për 48 orë zbatimin e fazës së dytë të vendimit për riregjistrimin e makinave me targa ilegale serbe në RKS – Republika e Kosovës.
Po ashtu sot në Bruksel do të takohen kryenegociatorët e Kosovës dhe Serbisë, Besnik Bislimi dhe Petar Petkoviq – nën ndërmjetësim të të dërguarit të Bashkimit Evropian për dialogun, Mirosllav Lajçak – për të diskutuar zgjidhjen për çështjen e targave ilegale serbe.