Kryetari i Aleancës për Ardhmërinë e Kosovës (AAK), Ramush Haradinaj, ka kritikuar Qeverinë Kurti se po tallet me gratë, rininë e mërgatën, duke thënë se “nuk ka tallje më të madhe sesa të thuash se fitoren ma kanë dhënë rinia, gratë dhe diaspora e të llogaritësh prapë në mbështetjen e tyre”.
Në një postim në Facebook, Haradinaj ka theksuar se rinia s’ka qenë kurrë në gjendje më të pashpresë sesa në këtë qeverisje, duke shtuar se edhe pozita e gruas është e papërfillshme dhe se diasporës i janë mbyllur të gjitha dyert për t’u bërë pjesë e vendimmarrjes.
Sipas Haradinajt, dhuna ndaj grave si rezultat i “depresionit kolektiv të shkaktuar nga kjo qeveri po merr përmasa shqetësuese”.
“Nuk ka tallje më të madhe sesa të thuash se fitoren ma kanë dhënë rinia, gratë dhe diaspora e të llogaritësh prapë në mbështetjen e tyre. Të rinisë e cila kurrë nuk ka qenë në gjendje më të pashpresë. Të rinisë e cila në përmasa të frikshme po e braktisë vendin. Të rinisë e cila as nuk ka punë, as të hyra, as arsim cilësor e as shpresë se kjo qeveri e ky kryeministër, mund ta ndryshojë gjendjen për ta. Nuk ka fyerje më të madhe sesa të thuash e kemi mbështetjen e grave, kur pozita e gruas e përfshirja e saj në jetën publike, është pothuaj e papërfillshme. Ku dhuna ndaj grave, edhe si rezultat i një depresioni kolektiv të shkaktuar nga kjo qeveri, po merr përmasa shqetësuese”, ka shkruar Haradinaj.
Haradinaj është zotuar se gjendja do të ndryshojë.
“…Të diasporës që i janë mbyllur të gjitha dyert për të investuar, për të kontribuuar e për t’u bërë pjesë e vendimmarrjes në vendin e tyre. Dhe do të ndryshojë kjo gjendje. Rinia, gratë e mërgata, nuk do të jenë kategori të nëpërkëmbura, por do t’i rikthejmë në vendin që u takon”, ka theksuar ai.