Kryetari i Aleancër për Ardhmërinë e Kosovës (AAK), Ramush Haradinaj, u ka uruar qytetarëve të Kosovës festën e Fitër Bajramit.
Me anë të një postimi në Facebook, Haradinaj ka thënë se një ditë si ajo e Fitër Bajramit përkujton rëndësinë e të mbajturit zemrën të pastër, e njëherit edhe rëndësinë për t’i ndihmuar nevojtarët.
“Festa e Fitër Bajramit nuk është thjesht një festë fetare. Është një ditë që na përkujton edhe një herë rëndësinë e mirësisë, faljes, dhe solidaritetit. Na përkujton se sa e rëndësishme është t’i mbajmë zemrat e pastërta dhe t’i hapim krahët atyre që kanë nevojë. Uroj që ky mesazh të përcillet gjeneratë pas gjenerate, duke ndarë të mirën dhe duke dëshmuar humanizmin, si vlerë e jona e patjetërsueshme. Me mesazhet që përçon kjo festë, uroj Bashkësinë Islame të Kosovës, myftiun Naim Tërnava dhe të gjithë shqiptarët myslimanë kudo që jetojnë ata. Me fat Fitër Bajrami!”, ka shkruar Haradinaj.
Mëngjesin e hershëm të së premtes është falur namazi i Fitër Bajramit në të gjitha xhamitë e Kosovës.
Fitër Bajrami është festa e cila bëhet pas mbarimit të muajit të Ramazanit. Emri Fitër Bajram vjen nga ajo se myslimanët para ditës së bajramit shpërndajnë lëmoshë, solidarizohen me të varfrit, kështu për ta festuar së bashku këtë festë.