Nënkryetari i Lidhjes Demokratike të Kosovës (LDK), Lutfi Haziri, ka kritikuar krerët e shtetit, kryeministrin e vendit, Albin Kurti dhe presidenten Vjosa Osmani.
Haziri ka thënë presidentja Osmani sot dhe kryeministri Kurti dje “ishin në luftë për beteja të vogla”, por sipas tij, të njëjtit nuk po e shohin se po e “humbim luftën”.
“Presidentja sot dhe kryeministri dje, në luftë për beteja të vogla politike, por s’po shohin se ne po e humbim luftën”, ka thënë Haziri.
Ai ka thënë se në vend që këtë javë Kosova të anëtarësohet në KiE, kryeministri dhe presidentja kanë rikonfirmuar që “interesat personale i qesin gjithmonë para interesave të shtetit”.
“Këtë javë, në vend se të bëhemi anëtar të Këshillit të Europës, në kohën kur Serbia është në bankën e OKB-së për t’ua vendosur shenjën e gjenocidit përjetë e mot, ata kanë zgjedhur betejat e vogla, duke rikonfirmuar për të satën e herë që interesat personale i qesin gjithmonë para interesave të shtetit”, ka thënë tutje nënkryetari i LDK-së.
Sipas tij, nuk kanë parë asgjë akoma dhe se do të shokohen “besimtarët politikë” të Kurtit.