Deputeti i Lidhjes Demokratike të Kosovës, Lutfi Haziri, ka deklaruar se qëndrimi i partisë së tij për zgjedhjen e kryetarit të Kuvendit nuk lidhet me emrin e kandidatit të Vetëvendosjes, Albulena Haxhiu.
Haziri ka theksuar se LDK-ja ka qenë konstruktive në proces, por problemi sipas tij është më i thellë.
“Ne kemi qenë konstruktivë. Nuk ka të bëjë me emër të përveçëm për kryetare të Kuvendit”, ka theksuar Haziri.
Ai ka kritikuar kryeministrin në detyrë, Albin Kurti, duke e akuzuar për fushatë negative që, sipas tij, ka shkaktuar dëme të mëdha në vend.
“Zoti Kurti qe 20 vjet ka bërë fushatë negative me mjete konvencionale dhe jokonvencionale. Ai ka bërë lëndime kolektive në këtë republikë”, ka deklaruar ai para mediave pak para nisjes së seancës konstituive.