Kryetari i Komunës së Suharekës, Bali Muharremaj, ka shprehur gatishmërinë për ta ndihmuar komunën e Malishevës pas situatës së helmimit të 158 qytetarëve.
“Natyrisht besojmë, që institucionet shëndetësore në komunën e Malishevës do t’ia dalin me situatën e fundit të helmimit, dhe se me profesionalizëm po punohet në tejkalimin e kësaj situate. Megjithatë, ekipet tona shëndetësore nga komuna jonë, janë të gatshme t’iu ndihmojnë dhe asistojnë kurdo që e kanë të nevojshme. Për këtë rast kam biseduar edhe me kryetarin z. Ekrem Kastrati, duke e shprehur gatishmërinë tonë”, ka shkruar Muharremaj.
Komuna e Malishevës ka njoftuar mbrëmë se numri i qytetarëve të helmuar ka shkuar në 158.
“Është rritur në 158 raste numri i personave të helmuar, por situata është nën kontrollë dhe po monitorohet në vazhdimësi nga organet kompetente”, thuhej në njoftim.