Kryeministri i Kosovës, Albin Kurti dhe Presidentja e vendit, Vjosa Osmani e kanë dënuar sulmin e paprecedentë të Iranit ndaj Izraelit mbrëmjen e 13 prillit. E lidhur me reagimet nga dy krerët e shtetit, deputeti i Lidhjes Demokratike të Kosovës [LDK], Avdullah Hoti ka shkruar është mungesë respekti nga Kosova ndaj këtij vendi, fakti që ende s’ka ambasador atje.
Hoti përmes një postimi në rrjetin social “Facebook” ka thënë se po ndihet keq për faktin se qe 3 vjet prej kur Kosova mori njohjen nga Izraeli, atje përfaqësohet me të ngarkuar, dhe jo ambasador shteti.
“Është mungesë respekti e krerëve të shtetit të Kosovës ndaj njohjes që na erdhi direkt nga Shtëpia e Bardhë pas vitesh mungese të njohjeve. Kjo është mungesë respekti ndaj shumë marrëveshjeve që Izraeli ka nënshkruar me Kosovën pas shkëmbimit të misioneve diplomatike në shkurt 2021”, shkroi Hoti.
Hoti shtoi se Kosova mbetet e izoluar, pa zhvillim dhe pa integrime euro-atlantike nëse nuk i vlerësojmë dhe tregojmë mirënjohje ndaj aleatëve të vendit.
“Këta që më shanin në Kuvend për një marrëveshje të nënshkruar në Shtëpinë e Bardhë, e hidhnin dyshime për validitetin e kësaj njohjeje që erdhi direkt nga Shtëpia e Bardhë, duhet të tregojnë respekt e mirënjohje për aleatët e Kosovës. Pa ta Kosova mbetet e izoluar, pa zhvillim, pa integrime euro-atlantike”.