Një person ka humbur jetën si pasojë e një vetaksidenti të ndodhur në orët e para të mëngjesit në fshatin Dobrushë, në komunën e Istogut.
Sipas informacioneve fillestare, drejtuesi i automjetit ka humbur kontrollin mbi veturën dhe është përplasur me një shtyllë betoni, duke pësuar lëndime fatale.
Rastin e ka konfirmuar zëdhënësi i Policisë për rajonin e Pejës, Fadil Gashi, i cili bëri të ditur se në aksident ishte i përfshirë vetëm një automjet.
Në vendin e ngjarjes kanë dalë njësitë policore, ekipet emergjente mjekësore dhe zjarrfikësit, të cilët kanë bërë të mundur nxjerrjen e trupit nga vetura e dëmtuar.
Autoritetet kanë nisur hetimet për të sqaruar rrethanat e plota të aksidentit, ndërsa trupi i viktimës pritet të dërgohet në Institutin e Mjekësisë Ligjore për ekzaminime të mëtejshme.