Kryesindikalisti i Trepçës, Ibrahim Jonuzi, i ftuar në emisionin “Rreth e Rrotull“, në TV Dukagjini, ka folur për ndërprerjen e punës në ndërmarrjen Trepça dhe humbjen milionëshe gjatë kësaj kohe.
Jonuzi ka thënë se kjo gjë i paraprin keqmenaxhimit ndër vite në ndërmarrjen Trepça, dhe si rezultat i saj, sindikata ka njoftuar edhe institucionet e Republikës së Kosovës dhe akterët për menaxhimin e ndërmarrjes Trepça, por, sipas tij, gjithmonë janë injoruar.
“Puna nuk është ndalë në Trepçë, po vazhdojnë remontet dhe rehabilitimet e mjeteve të punës, mirëpo aktiviteti për eksploatimin xeheror, i cili krijon të hyrat financiare në ndërmarrje, është ndalë dhe si rezultat i saj kemi humbje milionëshe në ndërmarrjen Trepça”, ka thënë më tej Jonuzi.
Tutje kryesindikalisti Jonuzi ka thënë se në Kosovë sindikalizmi nuk është duke u vlerësuar dhe nuk është duke u parë si zëri i fuqisë punëtore, gjithmonë fuqia e ekzekutivit është më e lartë dhe sindikatat mundohen të injorohen.
Sipas Jonuzit, në probleme duhet qëndruar të bashkuar dhe jo të ndarë, sepse nuk i kontribuon ndërmarrjes Trepça, e cila po kalon në krizën më të madhe që nga paslufta.