Lëvizja Vetëvendosje ka njoftuar se zëvendësministri i Financave dhe kryetari i Qendrës së LVV-së në Skenderaj, Hysni Mehani, është sulmuar fizikisht të enjten në një kafeteri në qendër të Skenderajt.
Sipas reagimit të LVV-së, incidenti ka ndodhur derisa Mehani ishte duke pirë kafe me deputeten Arjeta Fejza dhe disa aktivistë të partisë.
Në njoftim thuhet se në sulm kanë qenë të përfshirë kryetari i Komunës së Skenderajt, Sami Lushtaku, dhe shoqëruesit e tij.
“Sot, në kafeterinë “Solo” në qendër të Skenderajt, është sulmuar brutalisht nga Kryetari i Komunës së Skënderajt Sami Lushtaku dhe truprojat e tij, zëvendësministri i Ministrisë së Financave, kandidati për deputet dhe Kryetari i Qendrës së LVV-së në Skënderaj, Hysni Mehani. Ky sulm fizik ndodhi në kohën kur z. Mehani ishte duke pirë kafe me deputeten Arjeta Fejza dhe aktivistë të LVV-së”, ka shkruar LVV-ja në Facebook.
LVV pretendon se fillimisht Mehani është goditur me grusht, ndërsa më pas edhe me gotë në kokë, duke pësuar lëndime.
Po ashtu, sipas tyre, sekretari i Qendrës së LVV-së në Skenderaj, Bahri Zabeli, është sulmuar teksa ka tentuar të ndërhyjë për të parandaluar përshkallëzimin e situatës.
“Hysni Mehani aktualisht është duke marrë trajtim mjekësor”, thuhet në reagimin e LVV-së.
LVV-ja ka publikuar edhe një fotografi të Mehanit, ku ai shihet i gjakosur në fytyrë pas incidentit.
Tutje, LVV ka kërkuar nga organet kompetente që rasti të trajtohet me urgjencë dhe të ndërmerren veprime ligjore ndaj përgjegjësve, ndërsa i ka bërë thirrje edhe PDK-së që ta dënojë sulmin.
