Instituti Albanologjik ka publikuar raportin përmbledhës të punës për vitin 2025, duke evidentuar një vit me intensitet të lartë kërkimor, botues dhe ndërkombëtar, si dhe ka shpalosur prioritetet strategjike për vitin 2026.
Sipas raportit, gjatë vitit 2025 janë zhvilluar 38 projekte shkencore (37 individuale dhe 1 kolektiv), të shtrira në fusha kyçe të albanologjisë: gjuhësi, letërsi, histori, etnologji, folklor dhe muzikologji.
Paralelisht, Instituti ka organizuar 18 aktivitete shkencore e përuruese, përfshirë tryeza shkencore, konferenca kombëtare e ndërkombëtare, promovime botimesh dhe kongrese.
Aktivitetet shkencore dhe ndërkombëtare
Gjatë vitit janë mbajtur konferenca me tematikë historike, letrare dhe diplomatike, si dhe “Java e Albanologjisë” si aktiviteti qendror vjetor.
Instituti ka qenë i pranishëm edhe në skenën ndërkombëtare, me pjesëmarrje në kongrese dhe konferenca në rajon dhe më gjerë, ku studiuesit e tij kanë prezantuar 59 kumtesa në vende të Evropës, Turqisë dhe ShBA-së, si fizikisht ashtu edhe online.
Veprimtaria botuese
Një nga shtyllat kryesore të vitit 2025 ka qenë botimi shkencor. Në total, 31 vëllime janë botuar ose janë në proces final botimi, përfshirë revista të rregullta, monografi, përmbledhje kumtesash dhe materiale albanologjike.
Lista përfshin botime nga fusha të ndryshme, si studime gjuhësore, historiografike, letrare dhe folklorike, si dhe numrat e rinj të revistës “Gjurmime albanologjike”.
Kërkimi në terren dhe ligjëratat
Instituti ka vazhduar edhe punën kërkimore në terren dhe arkiva, ku 11 studiues kanë realizuar mbi 75 ditë kërkime individuale.
Programi “Leksione albanologjike” ka sjellë gjatë vitit 8 ligjërata nga albanologë të njohur, duke forcuar dialogun shkencor dhe shkëmbimin akademik.
Projekte madhore dhe bashkëpunime
Një projekt strategjik që ka hyrë në fazën përfundimtare është “Fjalori i Madh i Gjuhës Shqipe”, me mbi 125.000 njësi leksikografike, i cili pritet të botohet online gjatë pjesës së parë të vitit 2026.
Gjatë vitit 2025 janë nënshkruar 5 marrëveshje bashkëpunimi ndërinstitucionale, si dhe janë realizuar vizita zyrtare me institucione partnere nga rajoni dhe Turqia.
Infrastrukturë dhe rregullore
Raporti evidenton edhe hapa në përmirësimin e infrastrukturës dhe kuadrit rregullator: miratimin e rregulloreve të reja për punën shkencore dhe këshillin shkencor, si dhe nisjen e riparimit të kulmit të Institutit.
Planet për vitin 2026
Për vitin 2026, Instituti Albanologjik ka vendosur prioritetet në:
- përfundimin e projektit të kulmit dhe përmirësimin e hapësirave të jashtme;
- ndërrimin e domenit zyrtar në një domen shtetëror dhe krijimin e hapësirës online për botimet;
- digjitalizimin e revistave shkencore dhe indeksimin ndërkombëtar;
- përfundimin dhe publikimin online të Fjalorit të Madh të Gjuhës Shqipe;
- vazhdimin e projekteve shkencore dhe organizimin e aktiviteteve të përbashkëta me institucione vendore e ndërkombëtare, me “Javën e Albanologjisë” si aktivitet kryesor vjetor.