Instituti Norvegjez Nobel ka deklaruar se Çmimi Nobel për Paqe nuk mund të transferohet, të ndahet apo të revokohet, pas deklaratave të lideres së opozitës venezuelase María Corina Machado, e cila sugjeroi se mund t’ia dhuronte çmimin e saj të vitit 2025 presidentit amerikan Donald Trump.
Në një deklaratë zyrtare, Instituti tha se vendimi për dhënien e një Çmimi Nobel është përfundimtar dhe i përhershëm, duke iu referuar statuteve të Fondacionit Nobel, të cilat nuk lejojnë ankesa, shkruan CNN, transmeton Dukagjini.
Gjithashtu u theksua se komitetet që ndajnë çmimet nuk komentojnë veprimet apo deklaratat e fituesve pas marrjes së çmimit.
“Sapo shpallet një Çmim Nobel, ai nuk mund të revokohet, të ndahet apo të transferohet te të tjerë,” thanë të premten Komiteti Norvegjez Nobel dhe Instituti Norvegjez Nobel.
“Vendimi është përfundimtar dhe mbetet i vlefshëm përgjithmonë.”
Të hënën, Machado, duke folur për Sean Hannity në Fox News, deklaroi se dhënia e çmimit Trumpit do të ishte një akt mirënjohjeje nga populli venezuelas për rrëzimin e Nicolás Maduro-s, presidentit të vendit, i cili u kap javën e kaluar nga Shtetet e Bashkuara.
“E ke ofruar ndonjëherë t’ia japësh atij Çmimin Nobel për Paqe?” e pyeti Hannity. “A ka ndodhur realisht kjo?”
Ajo u përgjigj: “Ende nuk ka ndodhur.”
Trump, i cili prej kohësh ka shprehur interes për fitimin e Çmimit Nobel për Paqe dhe e ka lidhur atë herë pas here me arritje diplomatike, tha se do të ishte i nderuar ta pranonte çmimin nëse Machado do t’ia ofronte gjatë një takimi të planifikuar në Uashington javën e ardhshme.
Machado, ish-deputete e Asamblesë Kombëtare, u ndalua të kandidojë në zgjedhjet e përgjithshme të Venezuelës në vitin 2024 nga autoritetet e lidhura me regjimin e Maduro-s.
Ajo mbështeti një kandidat zëvendësues, i cili gjerësisht u konsiderua se fitoi zgjedhjet, megjithëse Maduro shpalli fitoren. Auditime të pavarura të votave treguan parregullsi në rezultatet zyrtare.