Inspektorati Policor i Kosovës i ka rekomanduar Policisë së Kosovës suspendimin e tre zyrtarëve policorë në dy raste të ndryshme, një në Kllokot dhe një tjetër në Fushë Kosovë.
Përmes një postimi në Facebook, IPK-ja ka bërë të ditur se informatat e para për rastin e Kllokotit i ka pranuar përmes Linjës së Kaltër lidhur me dyshimin se dy zyrtarë policorë janë të përfshirë si të dyshuar në kryerjen e veprës penale “keqpërdorim i pozitës apo autoritetit zyrtar”.
Sipas raportimit të një qytetari, këta dy zyrtarë policorë nuk kanë ndërmarrë veprimet hetimore ndaj të dyshuarve pas ankesës së tij e njëherësh, nuk kanë përfshirë në deklaratën e tij kërcënimet që ai kishte pranuar nga një zyrtar i lartë i komunës së Kllokotit.
Hetuesit e IPK-së janë duke zhvilluar hetime nën dyshimin se dy zyrtarët policorë kanë kryer veprën penale “keqpërdorim i pozitës apo autoritetit zyrtar”. Një veprim i tillë vjen pas verifikimit të informacioneve të pranuara nga ankuesi dhe pas një konsultimi me Prokurorinë Themelore në Gjilan.
Me rekomandim të Inspektoratit Policor të Kosovës, zyrtarët e përfshirë si të dyshuar në këtë rast janë suspenduar.
Në rastin e dytë, Inspektorati Policor i Kosovës i kanë rekomanduar Policisë së Kosovës suspendimin e një zyrtari policor nën dyshimin për veprën penale, kanosje, informatat për rastin e të cilit, IPK-ja i ka pranuar mbrëmjen e së shtunës.
Bëhet e ditur se hetuesit e IPK-së në koordinim me Prokurorinë e Shtetit, do të vazhdojnë të ndërmarrin edhe veprime të mëtejshme hetimore.