Ish-diplomati Blerim Canaj, ka deklaruar Partia Demokratike e Kosovës (PDK) dhe Lidhja Demokratike e Kosovës (LDK), janë duke garuar për vendin e dytë në zgjedhjet e ardhshme.
Sipas tij, të dorëzohesh para kohës është absurde.
“Do të ishte absurde që partitë, sepse po e vërej që PDK-ja dhe LDK-ja siç duket ende po e kanë një betejë për vendin e dytë dhe kështu është pastaj pyetja pse duhet të bëhet betejë para kohe, a është dorëzim para kohe apo çfarë”, ka deklaruar ai në emisionin FIVE.
PDK-ja e ka prezantuar si kandidat për kryeministër, Bedri Hamzën, për këtë, ish-diplomati Canaj ka thënë se ky vendim i tyre e ka sjellë partinë në vendin e dytë.
“Ofrimi i një kandidati të tillë mendoj që e ka sjellë PDK-në në vendin e dytë në një situatë të tillë çfarë ka qenë, e them shlirë që një kandidatë i tille e ka sjellë PDK-në në vendin e dytë për shkak se ka qenë aty beteja”, ka deklaruar mes tjerash Canaj.
Po ashtu, edhe politologu Fidan Ukaj, ka thënë se Hamza është kandidati i duhur i PDK-së që e nderon edhe qytetarin e Kosovës.
“Bedri Hamza është kandidati [për kryeministër] i duhur i PDK-së që e nderon edhe qytetarin e Kosovës, për arsye se nëse e shohim në aspektin e kandidatëve të tjerë, ky nuk ka pasur afera korruptive, po ashtu ka pasur një mirëqeverisje në përgjegjësitë e tija që i ka pasur”, ka deklaruar Ukaj në FIVE.
Ndërsa, sipas Ukajt, Lëvizja e Vetëvendosjes (LVV) nuk do ta ketë një përqindje si në zgjedhjet e kaluara.
I pyetur se kush e rivalizon kryeministrin Albin Kurti më shumë në këtë kontekst, Ukaj ka thënë përderisa nuk ka një bashkim të partive opozitare, LVV-ja do të jetë përsëri në krye.
“Nëse do të ishte një bashkim i opozitës mendoj se do të ishte një rival serioz karshi pozitës. Ndërsa kjo ndarje, ose ky mosbashkim i opozitës i krijon favor Lëvizjes Vetëvendosje dhe Kurtit që të jetë po prapë partia e parë në Kosovë”, ka deklaruar Ukaj.
Por, sipas Canajt kjo varet shumë nga aktiviteti i partive opozitare se sa do të jenë aktive dhe çfarë strategjie do ta përdorin.