Ish-kryebashkiaku i Durrësit, Vangjush Dako, i arrestuar për “keqpërdorim të detyrës zyrtare”, do të dalë para trupit gjykues. Seanca gjyqësore në apel do të shqyrtohet nga gjyqtarja, Daniela Shirka.
Dako u arrestua më 6 qershor, me urdhër të Prokurorisë së Posaçme, nën dyshimet për keqpërdorim të detyrës zyrtare në dy raste.
E para, ka të bëjë në lidhje me dhënien e lejes për ndërtimin e një pallati në Durrës, e cila ishte në kundërshtim me ligjin.
Ndërsa e dyta ka të bëjë me tenderin për blerjen e një projekti për zhvillimin e vijës bregdetare që iu rrit vlera dhjetëfish më shumë. Së bashku me Dakon, u lëshuan 10 urdhërarreste edhe për zyrtarë të tjerë shtetërorë.
Për këto dy akuza, Dako u shpreh para trupi gjykues, duke pretenduar se kanë qenë anëtarët e komisionit të vlerësimit të ofertave ata që kanë dhënë lejen dhe jo ai.
Por, në fund ishte nënshkrimi i tij dhe Prokuroria pretendon se Dako ka keqpërdoruar detyrën zyrtare.
Ndryshe, në seancën e Gjykatës së Apelit, ish-kyrebashkiaku, Dako ka kërkuar një masë më të lehtë sigurie si “arrest shtëpie” apo “detyrim për t’u paraqitur në Prokurori”, raporton abcnews.al, transmeton Portali Dukagjini.