Ish-prokurorja e EULEX-it në Kosovë, Maria Bamieh, e cila ditë më parë e kishte fituar rastin në gjykatën e Britanisë, ndaj këtij misioni, do të mbajë konferencë për media të shtunën në ora 11:00 në Prishtinë.
Bamieh, ishte shkarkuar, pasi kishte sinjalizuar për korrupsion në misionin e Eulex-it në Kosovë.
Pas fitimit të rastit, ajo do të dëmshpërblehet nga Britania e Madhe me rreth 400 mijë funta.
Bamieh kishte pretenduar se për tetë vjetët e fundit Zyra e Jashtme për Zhvillim (FCDO), një department i qeverisë britanike dështoi të ofrojë mbështetje për të, pasi ajo u përpoq të ekspozonte bashkëpunimin e mundshëm midis zyrtarëve të BE-së dhe kriminelëve të dyshuar në Kosovë.
Sipas saj, zyrtarët qeveritarë i kanë thënë t’i injoronte provat e dukshme të marrëveshjes së fshehtë në misionin e BE-së për sundimin e ligjit, të quajtur EULEX.
Maria Bamieh kishte akuzuar misionin e EULEX-it për largim të padrejtë nga puna pasi bëri akuza për korrupsion kundër prokurorëve dhe gjykatësve ndërkombëtarë që shërbenin në Kosovë.