Kryetari i Shoqatës së Familjarëve të Dëshmorëve, Xhavit Jashari, pas takimit me presidenten e Kosovës, Vjosa Osmani, ka thënë se nëse miratohet ligji për pagën minimale, veteranët do ta bllokojnë punën e Kuvendit të Kosovës.
Ai tha se nga Osmani kanë kërkuar që të mos e dekretojë ligjin aktual për pagën minimale, që i lë veteranët jashtë.
“I dini qëndrimet e organizatave të dala nga lufta, kërkesat nga degët që i kemi në tërë komunat e Kosovës dhe qëndrimi i përbashkët i joni është që të mbajmë protestë dhe të bllokojmë tutje punën e parlamentit. Dhe ne i shprehëm gjithë shqetësimet tona, ia shprehëm gjithë ato çfarë patëm për t’i thënë presidentes. I bëmë kërkesë në kompetencat e saj që mos ta nënshkruajë një ligj të tillë i cili diskriminon kategorinë shumë të veçantë, kategorinë që ka dhënë shumë në luftën e lavdishme të UÇK në këtë rast veteranët e luftës”, tha ai.
Jashari tha se përveç rrugëve ligjore, veteranët do ta kundërshtojnë ligjin për pagën minimale edhe me protesta, dhe se nuk do t’i lejojnë deputetët e Kuvendit të hyjnë brenda objektit.
“Dhe po besoj edhe në përputhje me ligjet që janë në zbatueshmëri në Qeverinë e Kosovës, e që ka plot shkelje, për këto kategori, dhe i them se do t’i shfrytëzojmë gjitha rrugët ligjore por gjithsesi do ta kundërshtojmë edhe me protestë siç e kemi marrë vendimin që edhe të bllokojmë deputetet që të mos futen në parlament ku kanë fyer skajshmërisht veteranët e luftës, kur dolën edhe përgjimet se biseduam edhe për ato”, tha ai.