Ish-deputeti i PDK-s, Ardian Kastrati, ka kritikuar mënyrën se si u organizua Konventa e 12-të e Partisë Demokratike të Kosovës(PDK), duke thënë në Debat Plus në RTV Dukagjini se “u mbajt shumë shpejt” dhe se duhej të zhvillohej një debat i gjerë brenda partisë para zgjedhjes së kryetarit. Sipas tij, procesi ishte i mbyllur dhe jo gjithëpërfshirës.
Kastrati tha se Konventa duhej të kishte më shumë diskutime të brendshme, duke akuzuar ish-kryetarin Memli Krasniqi për “kapje” të procesit dhe madje se “edhe nominimi i Bedri Hamzës është bërë nga vetë Krasniqi”.
Ai e vlerësoi rezultatin si “gjysmë lajm i mirë dhe gjysmë lajm i keq”.
“Me të mirin po filloj: lajmi i mirë është që Memli Krasniqi nuk është më në krye të partisë… ka qenë bashkëpunëtor i denjë i Albin Kurtit për 5–6 vitet e fundit”, tha ai.
Kastrati shtoi se Bedri Hamza është “njeri kredibil me integritet”, por sipas tij mbetet të shihet “sa do të mund ta zbatojë këtë integritet në terren”.
Ai theksoi se PDK ndodhet në një nga momentet më të vështira të strukturimit në gjithë historinë e saj, ndërsa rikujtoi se në zgjedhjet e fundit, Memli Krasniqi ishte vetëm “lideri i katërti me votë partiake”, pas Hamzës, Kurtit dhe Abdixhikut.