Këshilli i Ambasadorëve Shqiptarë ka uruar qytetarët e Republikës së Kosovës për liberalizmin e vizave dhe lëvizjen e lirë në vendet e Bashkimit Evropian (BE).
“Qytetarët dhe institucionet e Republikës së Kosovës si gjithmonë dëshmuan se, nuk heqin dorë nga rrugëtimi drejt integrimeve euroatlantike, përkundër pengesave të shumta që dalin gjatë këtij rrugëtimi”, thuhet në postimin e tyre.
Në postim thuhet se Këshilli i Ambasadorëve Shqiptarë është shprehur krenar që liberalizimi i vizave nga BE-ja për qytetarët e Kosovës ka qenë prioritet në agjendën e vet.
“Republika e Kosovës është shembull i demokracisë për tërë rajonin, e cila po dëshmohet çdo ditë e më shumë, si dhe qytetarët e saj, e merituan lëvizjen e lirë për një kohë të gjatë”, thuhet tutje në postim.
Këshilli i Ambasadorëve Shqiptarë vlerëson se integrimi i Republikës së Kosovës në të gjitha organizatat ndërkombëtare e, sidomos, anëtarësimi në NATO, është veprimi më i rëndësishëm, që përfundimisht do të garantonte sigurinë në rajon dhe më gjerë.