Nga data 25 gusht deri më 13 shtator njësitë e misionit të KFOR-it të udhëhequr nga NATO do të marrin pjesë në stërvitjen e Forcave të Bashkimit Evropian (EUFOR) në Bosnjë dhe Hercegovinë, “Reagimi i Shpejtë 2024”.
Në njoftimin që KFOR-i e ka dërguar për media, thuhet se “ky është një tjetër demonstrim i prekshëm i bashkëpunimit të NATO-s dhe BE-së në mbështetje të stabilitetit rajonal”.
Paralajmërohet se si rrjedhojë mund të ketë kolona në trafik përgjatë rrugëve kryesore dhe në pikat e kalimit kufitar.
“Personeli dhe asetet e KFOR-it do t’i bashkohen zonës së stërvitjes me transport tokësor. Kështu, banorët vendas mund të presin të shohin një rritje të trafikut rrugor, duke përfshirë përgjatë rrugëve kryesore dhe në pikat e kalimit”, thuhet në njoftim.