Një burrë 34-vjeçar ka humbur jetën dhe një grua 30-vjeçare ka mbetur e plagosur si pasojë e një sulmi me thikë që ka ndodhur rreth orës 15:00 në një ndërtesë në rrugën “B” në Prishtinë.
Policia e Kosovës ka konfirmuar për Dukagjinin se pas pranimit të informatës ka dalë menjëherë në vendin e ngjarjes, ku kanë nisur hetimet për të sqaruar rrethanat e rastit.
“Me të marrë informatën policia ka dalë në vendin e ngjarjes duke filluar menjëherë me ndërmarrjen e veprimeve hetimore me synim sqarimin e rrethanave të rastit”, ka thënë zëdhënësja e policisë për Rajonin e Prishtinës, Flora Ahmeti.
Tutje Ahmeti ka thënë se mjekët emergjentë kanë konstatuar vdekjen e burrit në vendngjarje, ndërsa gruaja është dërguar për trajtim mjekësor.
Bazuar në të dhënat fillestare, dyshohet se të dy kanë pësuar lëndime nga një mjet i mprehtë, dyshohet thikë. Hetimet janë duke vazhduar, ka thënë Ahmeti për Dukagjinin.