Policia e Kosovës ka bërë të ditur se të shtunën e 7 janarit, ka sekuestruar në Drenas një thikë, afro pesëdhjetë fishekë dhe një sasi substancash narkotike.
Në njoftimin e Policisë thuhet se rreth orës 02:00 të së shtunës, zyrtarët policorë të Drenasit kanë ndaluar një automjet, në të cilin, ishin tre persona. Siç bëhet e ditur, atyre u janë gjetur dhe sekuestruar gjërat e lartcekura.
“Pas verifikimit të personave dhe kontrollit të tyre dhe automjetit, zyrtarët policorë kanë gjetur dhe sekuestruar: -një armë të ftohtë (thikë), -46 fishekë dhe -një sasi të substancës narkotike. Po ashtu, nga policia është bërë edhe kontrolli i banesës së njërit prej personave të dyshuar, ku është gjetur dhe sekuestruar një armë zjarri e tipit TT”, thuhet në njoftimin e Policisë.
Policia ka bërë të ditur se tre personat e dyshuar janë shoqëruar në stacion policor, ku ndaj tyre është hapur rast për dy vepra penale.
“Tre personat e dyshuar janë shoqëruar në stacion policor dhe ndaj tyre është hap rast për veprat, Mbajtje në pronësi, kontroll ose posedim të armës, si dhe posedim i pa autorizuar i substancave psikotrope, apo analoge”, bëhet e ditur në njoftimin e Policisë së Kosovës.