Kongresi amerikan shmangu mbylljen e qeverisë deri pas pushimeve të fundvitit, duke miratuar një paketë të përkohshme financimi.
Senati u mblodh gjatë natës për të miratuar projektligjin me 87 vota për dhe vetëm 11 kundër dhe ia dërgoi presidentit Joe Biden për nënshkrim, një ditë pasi ai u miratua në Dhomën e Përfaqësuesve.
Projektligji siguron buxhetin deri në fillimin e vitit të ardhshëm, kur Kongresi do të detyrohet të punojë për tejkalimin e dallimeve të thella mbi shkallën e financimit të qeverisë.
Miratimi i projektligjit shmangu mbylljen e qeverisë pak para skadimit të afatit më 17 nëntor.
“Këtë të premte mbrëma nuk do të ketë mbyllje të qeverisë”, tha udhëheqësi i shumicës në Senat, Chuck Schumer, në një fjalim para votimit përfundimtar.
Paketa siguron zgjatjen e periudhës së financimit për disa agjenci dhe programe qeveritare deri më 19 janar, e për disa të tjera deri më 2 shkurt, duke krijuar dy afate për një mbyllje të mundshme të qeverisë./VOA