Kryetari i Kuvendit të Kosovës ka thënë se letra e ish-përfaqësueses së lartë të BE-së për Politikë të Jashtme, Federica Mogherini, e siguron Kosovën se edhe nëse formohet Asociacioni, nuk do të ketë autonomi serbe.
Konjufca u shpreh se këtë letër Kosova do ta shfrytëzojë në dialogun me Serbinë, dhe se sipas tij, kjo është njëlloj garancioni nga Bashkimi Evropian, se Asociacioni nuk do të jetë i dëmshëm.
“Ne duhet ta kemi mirëbesimin, shpresën, që ky dialog është përnime për normalizim, deri në fund do ta mbrojmë shtetësinë edhe me argumente të BE-së. Letra e Mogherinit, p.sh, ne nuk do ta konsiderojmë vetëm si një copë letre që hedhet në bërllok, por do ta konsiderojmë një garanci serioze të BE-së, që neve për me na lehtësu pjesëmarrjen në dialog, kanë thënë se mos u frikësoni se Asociacioni nuk do të jetë autonomi serbe, nuk do të jetë Qeveri e serbëve. Letra është në arkivat e Qeverisë së Kosvoës”, tha Konjufca.