Ministrja e Drejtësisë së Kosovës, Albulena Haxhiu, të hënën e ka pritur në takim homologun e saj nga Shqipëria, Ulsi Manja, me të cilin kanë biseduar për mundësinë e thellimit të bashkëpunimit në mes të dy ministrive.
Të dy ministrat njoftuan se brenda këtij viti do të finalizohet marrëveshja për shërbimet sprovuese për dënimet alternative.
Në konferencën e përbashkët për media, ata thanë se personat e dënuar nuk do të kenë nevojë të paraqiten në shtetet ku e kanë marrë dënimin.
Qytetarët e Kosovës të cilët janë dënuar në Shqipëri nuk do të kenë nevojë të paraqiten në Shqipëri dhe anasjelltas.
“Do të kemi një marrëveshje për dënimet alternative për qytetarët e Kosovës të dënuar në Shqipëri, pas kësaj marrëveshjeje do të jetë në Kosovë instituti që do t’i mbikëqyrë këta të dënuar”, tha ministri i Drejtësisë së Shqipërisë, Ulsi Manja.
Ndërkaq, edhe ministrja Haxhiu bëri të ditur se kanë diskutuar për negocimin e marrëveshjes për dënimet alternative për të burgosurit nga Kosova.
“Diskutuam për negocimin e marrëveshjes për njohjen e zbatimeve për dënimet alternative, e cila do të mundësojë që të burgosurit kosovarë, të liruar me kusht nga organet e Shqipërisë të mbikëqyren nga shërbimi sprovues i Kosovës dhe anasjelltas”, ka thënë Haxhiu.
Po ashtu, Haxhiu njoftoi se janë duke punuar me homologun e saj, për lejimin e ushtrimit të profesionit të avokatit si dhe për njohjen e ndërsjellë të provimit të jurisprudencës nga të dyja shtetet.
“Jetësimin e tri nismave, ku garantohet reciprociteti në lejimin e ushtrimit të profesionit të avokatit dhe ndërmjetësuesit në shtetet përkatëse, si dhe njohja e ndërsjellë e provimit të jurisprudencës”, ka thënë Haxhiu.
Ministri i Drejtësisë së Shqipërisë foli edhe për raportin dhe rezolutën e Dick Marty-t, për të cilin tha se është në një vijë me kryeministrin e Shqipërisë Edi Rama, duke mos pranuar të komentojë më tej.