Sipas raportit më të fundit mbi lumturinë globale, vendet që kryesojnë listën janë Finlanda, Islanda dhe Danimarka.
Sipas edicionit më të fundit të World Happiness Report, Finlanda mban sërish vendin e parë si vendi më i lumtur në botë, duke e ruajtur këtë pozicion për të nëntin vit me radhë.
Pas saj renditen Islanda në vendin e dytë dhe Danimarka në vendin e tretë, njofton Dukagjini.
Kjo renditje përpilohet nga Qendra për Studime të Mirëqenies pranë Universitetit të Oksfordit dhe publikohet çdo vit në raportin për lumturinë botërore.
Një arritje e veçantë këtë vit është ajo e Kosta Rikës, e cila është ngjitur në vendin e katërt — rezultati më i lartë i arritur ndonjëherë nga një shtet i Amerikës Latine.
Më pas lista dominohet sërish nga vendet nordike, me Suedinë në vendin e pestë dhe Norvegjinë në vendin e gjashtë.
Në dhjetëshen më të mirë përfshihen edhe disa shtete të tjera evropiane: Holanda renditet e shtata, Luksemburgu i nënti dhe Zvicra i dhjeti. Ndërkohë, Izraeli është i vetmi vend nga Lindja e Mesme që gjendet në 20 vendet e para, duke u renditur i teti.
Kosova pozicionohet në vendin e 16-të, duke lënë pas disa shtete të zhvilluara si Gjermania, Austria, Sllovenia dhe Emiratet e Bashkuara Arabe.
SHBA-ja renditet në vendin e 23-të këtë vit, ndërsa Kanadaja në vendin e 25-të dhe Mbretëria e Bashkuar në vendin e 29-të.
Këto janë dhjetë vendet më të lumtura në botë:
1. Finlanda
2. Islanda
3. Danimarka
4. Kosta Rika
5. Suedia
6. Norvegjia
7. Holanda
8. Izraeli
9. Luksemburgu
10. Zvicra