Ministri në detyrë i Mbrojtjes, Ejup Maqedonci, ka njoftuar se të martën në Kosovë ka arritur një tjetër dërgesë e sistemeve raketore anti-tank OMTAS, të kontraktuara me prodhuesin shtetëror turk Roketsan në dhjetor të vitit 2023.
Maqedonci ka theksuar se këto sisteme rrisin ndjeshëm kapacitetet mbrojtëse dhe fleksibilitetin operacional të Forcës së Sigurisë së Kosovës (FSK).
“Sot pranuam dërgesën e radhës të sistemeve raketore anti-tank OMTAS, të kontraktuara me prodhuesin shtetëror turk Roketsan në dhjetor të vitit 2023.
OMTAS (Orta Menzilli Tanksavar Silah) është një sistem modern raketor anti-tank me rreze të mesme veprimi, i zhvilluar për të neutralizuar mjete të blinduara moderne, përfshirë tanke me mbrojtje reaktive, si dhe fortifikata mbrojtëse ushtarake.
Rritja e llojllojshmërisë dhe sasisë së sistemeve raketore anti-tank për ushtrinë tonë ka për qëllim mbulimin e distancave të ndryshme të veprimit, terreneve dhe skenarëve të kërcënimit, duke rritur fleksibilitetin operacional”, ka shkruar Maqedonci.
Edhe kryeministri në detyrë, Albin Kurti, ka përshëndetur arritjen e këtij sistemi në Kosovë.
“Më të fortë, më të sigurtë: sistemi antitank turk OMTAS, pjesë e arsenalit të ushtrisë sonë”, ka shkruar Kurti.