E enjtja e 15 shtatorit të vitit 2022, për Maqedoninë e Veriut është një datë historike pasi po këtë ditë fillon procesi i Skriningut, për anëtarësimin e këtij vendi në Bashkimin Evropian(BE).
Për këtë çështje ka shkruar dhe kryeministri i Maqedonisë së Veriut, Dimitar Kovaçevski, i cili ka thënë se “ky është një moment historik për ne, për progresin e vendit tonë në integrimin evropian, si një hap i radhës pas hapjes së negociatave mes Maqedonisë së Veriut dhe BE-së”.
Të mërkurën e 14 shtatorit, Kovaçevski, ka mbajtur takimin e parë me 27 delegatët e shteteve anëtare të BE-së.
“Në prag të fillimit të nesërm të procesit të skriningut për aderimin e Maqedonisë së Veriut në Bashkimin Evropian, sot mbajtëm takimin e parë me delegatët e 27 shteteve anëtare të BE-së. Grupi Punues i Këshillit të BE-së, ngarkuar për zgjerimin e BE-së”, ka shkruar Kovaçevski në Facebook.
Ai ka përfunduar duke shprehur mirënjohjen për punën e përfaqësuesve të Grupit Punues të Këshillit të BE-së, të cilët sipas tij janë duke e përkrahur Maqedoninë e Veriut në rrugëtimin e saj evropian për anëtarësimin e plotë në BE.