Kryetari i Partisë Demokratike të Kosovës (PDK), Memli Krasniqi, ka thënë se kryeministri i Kosovës, Albin Kurti, e ka pranuar propozimin evropian me vullnet dhe entuziazëm të plotë, siç është shprehur ai, nëse do të varej prej tij është çështje ditësh edhe nënshkrimi i këtij propozimi.
“Të përgëzoj për performancën, ishte interpretuese. I kurorëzuat ato negociata me marrëveshjen e bazuar në propozimin evropian, u pranua me vullnet dhe entuziazëm të plotë nga Kurti dhe duket se nëse do të varet prej tij është çështje ditësh edhe nënshkrimi i saj”, ka thënë Krasniqi.
Sipas tij, nëse analizohet preambula e kësaj marrëveshjeje, Kurti është pajtuar që të kapërcejë trashëgiminë e së kaluarës.
“Nëse analizohet preambula e kësaj marrëveshjeje, Kurti është pajtuar që të kapërcejë trashëgiminë e së kaluarës. Po e kapërcejmë pa e trajtuar siç kemi kërkuar vite me radhë, adresimin e krimeve të luftës siç kemi bërë vite me radhë”, ka vijuar ai.
Sipas tij, njohja e shtetit të Kosovës nga Serbia është shumë e nevojshme dhe nuk mund të arsyetohet kaq lehtë nga kryeministri Kurti.
“Të bëhemi anëtarë të OKB-së e NATO-s e ata le të mos na njohin 100 milionë vjet. Për mua është e vështirë të arsyetoj që tash e tutje të mos kërkojmë njohje de-jure nga Serbia. Rrjedhimisht nga situata e para dy viteve kur gjithë aletatët tanë flisnin për njohje , Kurti ka përfunduar në një kompromis tepër të rëndë”.