Të mërkurën e 25 majit, Kryetari i Partisë Demokratike të Kosovës (PDK), Memli Krasniqi ka prezantuar, Koordinatoren e Departamentit për Mbrojtje dhe Siguri Kombëtare në kuadër të Kabinetit për Qeverisje të Mirë, Besa Kabashi-Ramaj.
I pari i PDK-së është shprehur i lumtur se një eksperte për siguri kombëtare dhe mbrojtje, i është bashkuar rrugëtimit të tyre opozitar si pjesë e Qeverisjes së Mirë.
“Ajo do ta udhëheq njërin prej departamenteve më të rëndësishme të Kabinetit për Qeverisje të Mirë në PDK”, ka thënë në komunikatën e PDK-së.
Krasniqi ka folur lidhur me provojnë e Kabashi-t ku ka thënë se ajo ka mbi 10 vjet eksperiencë në fushën e sigurisë dhe çështjeve ndërkombëtare, sigurisë kombëtare, politikave publike, sektorit të sigurisë dhe reformave në fushën e mbrojtjes.
“Me përvojën e saj, bashkë me një ekip shembullor brenda Departamentit për Mbrojtje dhe Siguri Kombëtare, Besa do të udhëheqë punën në ofrimin e alternativës sonë për fushat e mbrojtjes dhe sigurisë, që do të jenë ndër fushat prioritare të KQM-së”, ka shtuar Krasniqi.
Nga ana tjetër, Koordinatorja e Departamentit për Mbrojtje dhe Siguri Kombëtare, Kabashi-Ramaj ka shprehur mirënjohjen për besimin e dhënë në këtë detyrë, duke thënë se siguria kombëtare duhet të jetë baza e shtetit të Kosovës, të ndërtuar me mund e sakrificë.
“Vetëm së bashku mund të krijojmë një të ardhme të sigurt, një të ardhme që fëmijët tanë ta konsiderojnë ta kenë këtu, në Kosovë, e jo diku larg saj. Prandaj, në ndërtimin e Platformës së Sigurisë Kombëtare dhe Mbrojtjes, ftojmë dhe presim bashkëpunim të ngushtë, që nga partitë tjera e deri tek shoqëria civile, ekspertët e fushës, partnerët ndërkombëtarë, e mbarë qytetarët e Republikës së Kosovës, shqetësimet e sigurisë të të cilëve do t’i dëgjojmë me vëmendje.”, kishte thënë Kabashi-Ramaj.